Em gavên pêşîn diavêjin

DENÎZ NAZLIM/ HAYRÎ DEMÎR / MA/ ENQERE

Parlamenterê HDP’û yê Amedê Îmam Taşçier ê di şandeya HDP’ê de cih girt, bal kişand ser serdana xwe ya Herêma Kurdistana Federe û got, “Ji bo kongreya neteweyî em gavên pêşîn diavêjin. Em armanc dikin ku refleksên me yên neteweyî bi pêş kevin.”

Şandeya HDP’ê ya Hevseroka Giştî ya Partiya Demokratîk a Gelan (HDP) Pervîn Buldan jî di navê de li Başûrê Kurdistanê bi partiyên siyasî KDP, YNK, Tevgera Gorran û gelek partiyên din re hatin gel hev. Parlamenterê HDP’ê yê Amedê Îmam Taşçier ê di nava şandeyê de bû, diyar kir ku rojeva wan a sereke yekîtiya neteweyî bû. 

Me ew pêvajo temam nekiribû

Taşçier, bal kişand ser serdanên HDP’ê yên salên 2016’an û wiha axivî: “Me xwest em van serdanên xwe dewam bikin. Ji bo yekîtiya neteweyî hêviyên mezin ji Bakurê Kurdistanê hene. Di wê pêvajoyê de hêviyên yekîtiyê pirr zêde bûn. Me ew pêvajo temam nekir. Ji ber ku gelek êriş li dijî HDP’ê hebûn. Hevserokên me, parlamenter û endamên partiya me hatin girtin. Me xwest em careke din dest bi wê pêvajoyê bikin. Piştî kongeya HDP’ê, destpêkê em çûn serdana Başûrê Kurdistanê. Ev pêvajoya niha pirr tevlîhev e. Sibe dê çi bibe, ne diyar e. Lê ligel vê yekê jî em rastî elaqeyeke mezin hatin.”

Çûyîna me pirr baş bû

Taşçier, diyar kir ku di hevdîtinan hema bibêje hemû partiyan de ramanên wan yek bûn û wiha axivî: “Di hevdîtinan de me li ser rê û rêbazan nîqaş kir. Di çarçoveya pêşniyazên di demên pêş de, em ê hevîtinên dualî bikin. Piştî desteserkirina Kerkûkê, partî ji hev xeyîdîne û diyalog lawaz bûye. Çûyîna me pirr baş bû. Partiyan hem bi me re û hem jî di nava xwe de diyalog bi pêş xistin. Ji ber pirsgirêkên navxweyî, diyalogên bi parçeyên Kurdistanê re kêm bûbûn. Me pêşniyarên hevdîtinên du alî, rêyên îqna kirin û girîngiya hatina gel hev kirin. Bi vî awayî me xwest em hevdîtinan dewlemend bikin. Me tenê pêşniyar kirin. Me got yekîtiya neteweyî girînge û divê demildest pêk were. Ji bo pêşketina vê yekê me  li ser rê û rêbazan nîqaş bi rê ve birin.”

Yekîtî divê tim hebe

Taşçier, da zanîn ku heger Kerkûk nehatiba dagirkirin, her 4 parçeyên Kurdistanê li dijî vê derbiketana, Efrîn wê wisan nebûya û wiha pê de çû: “Îro Efrîn heye. Sibe ger refleksek neteweyî tinebe, dê dîsan Efrîneke din rû bide. Ji ber vê yekê, divê yekîtiya neteweyî bê avakirin. Di hevdîtinan de, em li ser astengiyên heyî jî axivîn. Di nava partiyan de dilnexweşî hene. Dîsan di nava her çar parçeyan de dilnexweşî hene. Em niha gavên pêşîn ên kongreya neteweyî diavêjin. Yekîtî divê tim hebe. Divê her kes bi partiyên xwe reng bidin yekîtiya neteweyî. Heger refleksên me yên neteweyî bi pêş bikevin, yekîtiya me jî wê ava bibe. Yekîtiyeke li ser hilbijartinan bê avakirin, ti carî bi ser nakeve. Em dixwazin li ser nirxên neteweyî yekîtiyê ava bikin. Heger ev bi pêş bikeve, jixwe yekîtî dê bandora xwe li hilbijartinan jî bike. Wê demê, Kurd wê bi tifaqan karibin beşdarî hilbijartinan bibin. Kurd dê di qonaxên hilbijatinê de bi rola kilîdê rabin. Ji bo ev rola kilîdê xurt bibe, divê em yekîtiya xwe ava bikin.”