Gerîla sîlehên MÎT’ê rakirin

HPG’ê li ser çalakiyên gerîla yên li Sêrtê, Lêlikan, Gever û Çelê  daxuyanî da. Navenda Ragihandinê ya HPG’ê diyar kir ku 23’yê Adarê li Sêrtê 3 endamên payebilind ên MÎT’ê, hatine kuştin, her wiha li Gever û Lêlikan 9 esker hatine kuştin. 

Navenda Ragihandinê ya HPG’ê derbarê çalakiyên gerîla da doh daxuyaniyek da. Di daxuyaniyê de tê gotin, 23’yê Adarê li Sêrtê 3 endamên payebilind ên MÎT’a Tirk hatine kuştin û her wiha di çalakiyên Lêlikan û Geverê de jî 9 esker hatine kuştin, gelek esker jî birîndar bûne.

Di daxuyaniyê de hate gotin, 2 gerîla ji bo ku dîl nekevin destê hêzên dagirker, bombeyên xwe, bi xwe de teqandine.

Belgeyên rêveberên MÎT´ê ketin destê gerîla

Li gorî daxuyaniyê, di çarçoveya Pêngava Şoreşger a Şehîd Delîla û Şehîdên Bestayê 23’yê Adarê saet 13.30’an li Mava ya Sêrtê, di navbera gundên Meîna û Mulê de gerîlayan li dijî endamên îstîxbarata Tirk çalakiyek kir. Wesayiteke ku endamên MÎT’ê yên payebilind tê de bûn, derbeke serketî xwariye, wesayît ji rê derketiye û qulibî ye û hêzên gerîla li vir 3 endamên îstîxbaratê kuştine û dest danîne ser 3 AK-47’an û 5 jarjor û 150 guleyên van çekan danîne û her wiha dest li ser nasname û gelek belgeyên van şexsan.

‘Canşêr û Şoreş şehîd bûn’

Piştî çalakiyê, artêşa Tirk a dagirker  operasyoneke berfireh daye destpêkirin, û 24’ê Adarê di navbeyna hêzên gerîla û eskerên dagirker de şer qewimiye. Li ser şer daxuyaniya HPG´ê wiha dewam dike: “Di vî şerî de gelek eskerên dijmin hatin kuştin, hevrêyên me Canşêr û Şoreş ku li dijî eskerên dijmin bi lehengî şer kirin, ji bo ku nebin dîlên ber destê eskerên dijmin, bombeyên xwe bi xwe de teqandin û şehîd bûn. Operasyon 26’ê Adarê bi dawî bû. Di dema operasyonê de hêzên dagirker bi ser gundê Mulê de girti û zext li gundiyan kir.”

Girê Lêlikan goristana dagirkeran

HPG´ê li ser berxwedana li dijî dagirkeriya dewleta Tirk li Başûrê Kurdistanê jî daxuyaniyek da û got, “14’ê Nîsanê hêzên me saet 16.50’î li Lêlikan a Başûrê Kurdistanê li dijî artêşa TC’ê çalakî kir. Di çalakiyê de derb li mewzî û konên dijmin xistin û berbiçav 5 esker kuştin.”

HPG´ê ji bo çalakiyên gerîla li Bakurê Kurdistanê jî got, 14’ê Nîsanê sibehî gerîlayan li Geverê, li gire Elîşêr bi çalakiyekê, derb li eskerên Tirk da, lê hejmara eskerên kuştî û birîndar nehatiye zelalkirin.

30’ê Adarê jî hêzên gerîla li Geverê, di navbera qereqola Wargenima û girê Tempo bi çalakiyeke sabotajê ya li dijî wesayiteke zirxî ya artêşa Tirk, bi awayekî piştrastkirî 4 esker kuştin.

HPG´ê ji bo çalakiyekek heman rojê li Çelê ya Colemêrgê jî got, “li geliyê Deştanê (gerîlayan) li dijî hêzên dagirker çalakî kir. Di encamê de çend esker hatine kuştin û birîndar bûne, zelal nebûye.”

Nasnameya şehîdên HPG´ê

HPG´ê nasnameya gerîlayên di çalakiya li dijî endamên MÎT’ê de şehîd bûyî, wiha eşkere kir:

Canşêr Raman (Haydar Topkan) ê li Êlihê jidayikbûyî, 24’ê Adara 2018’an li Sêrtê jiyana xwe ji dest da; Şoreş Xeyrî (Mahmûd Îbîş), ê li Kobanê jidayikbûyî, 24’ê Adara 2018’an li Sêrtê jiyana xwe ji dest da.

ANF / BEHDÎNAN

2 esker li Agiriyê hatin kuştin 

Tê gotin ku li Bazîdê di şer de 2 leşkerên Tirk hatine kuştin, 3 leşker jî birîndar bûne. 

Li gorî nûçeyên medyaya Tirk, li navçeya Agiriyê Bazîdê, roja Înê piştî nîvrojê di navbera hêzên gerîla û leşkerên Tirk de şer qewimî.

Di vî şerî de li gorî çapemeniya Tirk, 2 eskerên artşa Tirk a dagirker hatine kuştin, 3 esker jî birîndar bûne.

Çavkaniyên herêmî bi xwe, dan zanîn ku gelek ambûlans çûne herêma şer. 

HPG’ê li ser vî şerê li Bazîdê, hîna daxuyanî nedaye. 

 ANF / AGIRÎ